ISTÓRIA EMA XINA SIRA NIA BISNIS

Karik uluk nia aman fan bé-minerál iha dalan ninin,

Nia oan sei loke restaurante,no nia bei-an sei loke fábrika bé-minerál nian.

           Wainhira ema Malaizia ukun-an tiha, grupu ida nia identidadi bele identifika ka hatene liu husi servisu nebé sira halo. Ema Melaiú koiñesidu nudar agrikultor. Ema Xina halo kontratu no domina sidadi. Ema Indianu sira hela bairru no servisu iha tos. Hafoin nasaun ne’e ukun-an liu tiha dékadu lima, identidadi grupu nebé bele identifika liu husi ema ida-ida nia servisu hahu lakon. Ema Melaiú no India mos hahu halo kontratu.  Ema Xina fali, komérsiu sai ona hanesan sira nia servisu prinsipál.

            Baze Ekonómika Foun nebé introdus iha inísiu tinan 1970, produs no hamosu duni emprezáriu balu, ema matenek iha komérsiu, no líder kompainia husi ema rai-laran, tantu husi grupu izlaun no grupu relijiaun seluk. Indikasaun ne’e fó prova katak komérsiu nudar área nebé bele aprende, no laos monopóliu husi grupu sosiedadi ida nian. Maibé, iha esforsu balu atu hamate ema Xina nia dominasaun iha área komérsiu, tó oras ne’e laiha rezultadu. Tanba relasaun komérsiu entre ema Xina forte lahalimar, ne’e duni susar atu sobu. Ida ne’e mak realidadi kuandu ema koalia konaba grupu sosiedadi Xina sira nia moris.

            Asaun ne’e la konsidera patriótiku. Ema Xina sira halo nune, laos tanba sira la hadomi sira nia rai ran fakar fatin. Maibé tanba sira tenki kontinua moris no lao ba oin. Sira husik sira ida-ida nia família nodi muda ba Austrália, Kanadá, Norte Amérika, Europa no Timor Leste. Saida mak sira halo nudar prosesu kontinuasaun sira nia bei-ala mai iha rai Malaizia. Evolusaun istória ne’e sei kontinua akontese atu kompleta ezijénsia síkulu ekonómiku mundiál nebé modifika beibeik. Ema Xina nudar ema rasa nebé fleksível tebetebes, fasil mudifika-an, no bele adapta-an ho situasaun oioin. Sira sei bele moris no buka han-hemu iha nebé deit sira ba.  Ida ne’e mak parte ida husi ema Xina nia matenek no abilidadi.

            Ema Xina sempre haré dok ba oin no sira la husik kondisaun sai estátiku ka mate iha fatin. Iha istória ema Xina nia komérsiu, ita sei haré katak komérsiu ema Xina nian sempre iha kresimentu ka mudansa. Sira bokan lais no bele foti oportinidadi negósiu nebé foun. Karik uluk nia aman fan bé-minerál iha dalan ninin, nia oan sei loke restaurante, no bei-oan sei loke fábrika bé-minerál. Atu dezenvolve-an liu, ema ne’e tenki muda-an laos deit fíziku-isin  nian maibé  mos mentál, ispíritu no hodi habesik-an ba Nia nebé iha Leten Ás.  Ema ida nia hakarak atu modifika-an mak nudar xave prinsipál ba nia susesu.

            Istória komérisu ema Xina nian hatudu katak iha mudansa boot barak no importanti. Halo komparasaun entre istória inísiu ema Xina mai iha rai Malaizia no pozisaun ema Xina agora ne’e. Ita sei haré, entre jerasaun da’uluk nebé mai uluk liu ho jerasaun tuir mai, hatudu diferente boot. Iha diferente boot ne’e nia kotuk, sira  iha nafatin buat nebé hanesan, mak ne’e: ispíritu hodi hasae moris diak no fiar ba komérsiu nudar mekanizmu hodi hametin posizaun ekonómika pesoál, família, komunidadi, no sira nia rasa.

           

Rezumu ikus, komérsiu ema Xina laiha formalidadi barak no burokrásia. Sira hakas-an halo atividadi komérsiu ne’e sai fasil diak liu. Tanba formalidadi no burokrásia hamate  rotasaun ekonómika.