Ita iha moru haleu uma hodi proteje ita,
maibé sira iha amigu barak hodi proteje sira.
Iha loron ida, aman riku ida lori nia oan la’o haleu nasaun laran, hosi munisípiu ida ba munisípiu seluk. Objetivu viajen ne’e atu hatudu ba nia oan oin sá ema barak moris iha kondisaun kiak. Hafoin sira to’o iha fatin ida, labarik nia aman disidi atu sira hela loron ruma iha família ida nia uma, tuir aman ne’e haree nu’udar família kiak liu. Família ne’e ninia atividadi moris loron-loron nu’udar ema kaer natar.
Wainhira fila hosi sira nia viajen, aman ne’e husu ba nia oan:
“Oin sá ita nia viajen, oan?”
“Viajen ne’ebe furak tebetebes be sá?”
“Ó rasik haree ona, oin sá ema kiak sira ne’e nia moris, “ aman ne’e husu atu hatene oan nia hanoin.
“Los pai. Ha’u mos kontenti tebes,” oan ne’e hatan.
“Agora konta ba, sá mak Ó aprende hosi viajen ne’e,” aman ne’e husu ba nia oan.
Nia oan hatan:
Ha’u haree katak ita iha asu ida de’it, maibé sira iha asu haat kedas.
Ita iha pisina ne’ebe naruk to’o jardin klaran de’it, maibé sira iha motan oan ne’ebe nia naruk la iha rohan.
Ita sosa ahi ampolas oi-oin tau iha ita nia jardin, maibé sira iha fitun no fulan naroman iha kalan.
Ita nia varanda, fatin tu’ur halimar nian naruk to’o uma oin, maibé sira nia varanda mak panorama ho orizonte ne’ebe nakloke luan tebes.
Ita hela iha rai uma fatin ne’ebe klo’ot, maibé sira iha rai no to’os ne’ebe matan haree la iha rohan.
Ita iha ema ne’ebe serví ita, maibé sira serví malu.
Ita sosa aihan, maibé sira kuda no hamoris aihan ba sira an rasik.
Ita iha moru haleu uma hodi proteje ita, maibé sira iha amigu barak hodi proteje sira.
Rona lia-fuan sira ne’e, aman ne’e sai monok tiha.
Hafoin oan ne’e ko’alia nune’e ba nia aman: “Pai, obrigadu tanba hatudu tiha ona mai ha’u, katak ita ne’e kiak oin sá”.