ÉTIKA NEGÓSIU

Dezvantajen iha tempu badak

nudar dalan nebé ema tenki liu atu hetan vantajen iha tempu naruk.

            Ema Xina fiar, komersiante nebé susesu tenki iha kbiit kreatividadi nebé ás alein kapasidadi atu hadau oportunidadi. Embora atu alkansa  ézitu no hetan proveitu refere, husu atu komersiante ida tenki uza maneira saida deit mak mosu iha nia hanoin. Maibé, buat ne’e la signifika komersiante bele uza maneira foer no bosok atu hamonu nia rivál. Komersiante Xina iha kódigu étika nebé bandu uza maneira foer. Hamonu ema seluk nia komérsiu nudar hahalok nebé povu Xina hotar tebes. Kompetisaun nudar asaun nebé susar atu hases hosi  komérsiu. Dala barak akontese kompetisaun makás nebé hamosu sizma no ostilidadi.

            Kompetisaun nebé saudável sei benefisia parte hotu. Nune mos kompetisaun nebé la justu sei la lori proveitu ba se deit no parte hotu. Karik iha parte ida mak hetan proveitu ne’e mos, hahalok ne’e sei la aguenta kleur. Buat ne’e sei sai hanesan fator prinsipál nebé halais nia monu no harahun nia atividadi komérsiu. Atu evita kompetisaun nebé la saudável, ema Xina sujere atu la involve iha atividadi komérsiu ka fan sasan nebé hanesan. Karik zona komérsiu hanesan, maibé aprosimasaun no produtu nebé fan labele hanesan. Nudar izemplu, karik iha komersiante nebé fan produtu báziku (hahan), komersiante seluk tenki fan hatais ou elektrónika, sllt.

            Iha industria aihan, izemplu, ita sei hasoru loja Xina nebé fan hahan nebé la hanesan. Dala barak ita sei hasoru loja barak no kioske fan supermi. Maibé se ita haré didiak, objetu nebé fan ne’e la hanesan. Ho liafuan seluk, kada loja sei fó atensaun espesiál ba aihan nebé iha ona trademark ka sai ona marka espesiál ba loja ka kioske ida. Nune, kompetisaun nebé akontese entre sira bele kontrola. Atu nune kompradores iha opsaun barak hodi hili loja no kioske nebé fan hahan nebé tuir sira nia gostu ka hakarak. Ba ema Xina, atividadi komersiante presiza habarak nia kualidadi tanba alein bele fó opsaun ba kompradores, buat ne’e mos bele tulun komersiante seluk hetan
rendimentu. Baibain, komprador baruk no kleur ka lalais sira muda ba loja seluk hodi goza ambiente foun. Étika nebé la hakerek ne’e fó dalan ba komersiante Xina sira bele moris iha zona ida no domina merkadu.

            Iha atividadi komérsiu, raru tebes ema Xina atu halibur hamutuk iha zona ida. La hanesan ho komersiante Melaiú gosta tebes halibur iha zona komérsiu ida no fan sasan hanesan. Ikus mai komersiante hotu-hotu lakon no lulun biti. Kompetisaun iha komérsiu la signifika komersiante sira labele servisu hamutuk no suporta malu. Ajuda malu no hamutuk mak diak liu duke hirus-odiu no fahe malu. Kompetisaun lolós haforsa komersiante sira nia posizaun no laos buka atu harahun fali grupu komersiante ne’e rasik.

            Maski dala barak iha impresaun katak sira hanoin-an rasik, maibé iha realidadi komersiante Xina bele servisu hamutuk wainhira hasoru situasaun nebé ameasa sira nia posizaun. Asuntu ne’e sai hanesan konkordansia ida entre komersiante Xina atu asegura ida-ida nia interese. La admite komersiante ida book fali  ema seluk nia atividadi komérsiu. Nune mos hahalok nebé dehan aat komérsiu, la admite mos iha kódigu étika komérsiu ema Xina nian. Kompetisaun nudar hahalok nebé ema hotu simu tuir konsiderasaun valor moral no umanidadi ka ema nian. Komersiante nebé la moris tuir no kaer ba étika ne’e sei hetan sansaun ka kastigu tuir lei povu Xina nian. Kastigu ne’e bele hanesan duni sai, soe-sai ba fatin dók, ka fó presaun nebé obriga nia hapára nia atividadi komérsiu.

            Komersiante sira tenki hanoin maneira hotu nebé pozitivu atu foti ás komérsiu no sira nia proveitu, laos ho aprosimasaun nebé aat. Iha maneira barak nebé komersiante Xina uza hodi foti ás komérsiu mak hanesan sasan nebé fan iha variedadi, hadia kualidadi atendimentu ba sosa-nain no esforsu kria relasaun nebé diak ho komersiante seluk. Maneira ne’e importanti atu sira hetan suporta hosi komersiante seluk, inklui kliente, sosa-nain no komunidadi. Komersiante labele tós liu. Maibé fó dalan atu haksesuk sasan folin nudar karakterístika  atividadi komersiante ema Xina nian. Wainhira hasoru situasaun nebé presiza atu hatun sasan folin, komersiante sira presiza halo nune sarak kompradores fiel nafatin atu mai vizita sira nia fatin ka loja.

            Estratejia ne’e kontradisaun ho étika komérsiu tanba ho maneira ne’e laos atu bosok ka lasu kompradores. Iha asuntu ne’e, kompradores ka kliente sei la lakon nia osan. Iha parte ne’e komersiante mak lakon. Maibé iha prátika komérsiu ema Xina nian, sira fiar katak dezvantajen iha tempu badak nudar dalan nebé tenki liu duni hodi hetan fali proveitu ka vantajen iha tempu naruk nian. Maneira ne’e la hanesan bosok, maibé estratejia ida atu atrai no hametin relasaun ho
kliente ka kompradores. Iha kódigu étika komersiante ema Xina nian, labele hanoin ka deskonfia resin. Sira tenki iha kompromisu no toleránsia. Proveitu laos prioridadi da’uluk. Buat nebé tenki sai prioridadi prinsipál mak komersiante tenki iha fuan nebé senti-lais no hametin relasaun pesoál ho nia asinante ka kompradores. Komersiante tenki iha kompradores ka kliente nebé permanente no motiva nia asinante atu fila ba sira.

            Komersiante Xina sai riku ho estratejia. Maibé, estratejia ne’e la konsidera nudar arte ida no abilidadi komérsiu. Étika komérsiu ema Xina fó dalan atu uza estratejia, wainhira maneira ne’e la hamosu dezvantajen ba komersiante no kompradores. Estratejia ne’e karik diak presiza lori proveitu ba parte rua hotu. Karik bele, hahalok ne’e fó ksolok no satisfaz parte hotu nebé involve iha asuntu komérsiu ne’e. Atu susesu, sira labele halo soin-sala. Sira tenki sériu ho kliente no tenki hatudu nia solenidadi wainhira halao asuntu komérsiu ne’e. Sira mos tenki sériu ho liafuan no promete hotu. Karik halo kréditu tenki selu iha tempu nebé aseita hamutuk ona. Komersiante nebé kontra étika komérsiu ema sei la fiar tan. Wainhira laiha fiar no konfiansa, imposível komersiante bele halo tan kontratu iha fatin hanesan hodi kontinua nia komérsiu. Kódigu étika komérsiu ne’e nudar kontrolu sosiál ida atu kontrola atitudi, lalaok merkadu nian. Nia objetivu atu ajuda komersiante hotu nia ézitu hodi hases tiha buat aat sira hosi komersiante balu nebé laiha responsabilidadi.

            Rezumu ikus, komersiante Xina iha kódigu étika nebé bandu uza maneira foer. No hamonu ema seluk nia komérsiu nudar hahalok nebé povu Xina hotar tebes. Kompetisaun iha komérsiu la signifika komersiante sira labele servisu hamutuk no suporta malu. Komunidadi seluk presiza aprende hosi maluk xinez sira nia esperiénsia ne’e atu hasa abilidadi no matenek iha bisnis atu kria kompetisaun nebé normal iha merkadu.