PASIÉNSIA LA MOE NO SERVISU MAKA’AS MAK DALAN BA SUSESU IHA NEGÓSIU

Buat pasiénsia ne’e moruk, maibé nia fuan midar tebetebes.

            Ema Xina nia sigredu susesu nian ida iha área komérsiu tanba servisu maka’as, no esforsu ne’ebé la hatene dezamina no dezapontadu. Hahalok rua ne’e laiha, esforsu saida deit mak ita halo sei laiha rezultadu,


lafolin. Dala ruma, frakasu bele sai mestri diak ba sira ne’ebé hakarak hala’o komérsiu. Iha frakasu mak halo ema ida bele aprende kona-ba sala, mukit, no frakeza hotu ne’ebé akontese. Tenki simu frakasu ho pozitivu atu servisu maka’as liu tan. Figura boot barak no negósiu-nain sira ne’ebé susesu iha mundu negósiu hasoru frakasu no monu hader. Maibé, sira hader-hamrik no harí falí sira nia bisnis hodi sai reinu bisnis ne’ebé boot no laiha komparasaun. Iha provas barak atu haré nudar izemplu.

            Istória multimilionáriu hosi Tailándia ne’ebé monu to’o kiak, bele sai hanesan motivu ispíritu ba komersiante sira ne’ebé mós uluk hetan esperiénsia frakasu ka monu iha bisnis. Multimilionáriu ne’e la’os deit sai kiak, maibé lakon nia sasan hotu-hotu iha krize ekonómika ne’ebé akontese iha Ázia iha tinan 1997. Ema ne’ebé uluk nudar konglomeradu susesu, agora sai bankarota ka osan-mohu. Derepenti, iha tempu badak deit, nia lakon rikusoin tomak tanba merkadu propriedadi iha Tailándia monu. Nia failla atu fó fila impréstimu ba banku tanba komdomíniu ne’ebé nia harí labele fa’an. Maski ema dehan nia bankarota tiha ona no tenki aguenta tusan todan boot, nia eforsu maka’as nafatin ho pasiénsia no harí fali nia reinu bisnis ne’ebé konsege naben hotu. Nia la foti dalan korta ho maneira oho-an hanesan komersiante balu ne’ebé monu ka failla. Kontráriu, nia hahu halo bisnis kiik, fan paun sandwich. Hahan ne’e nia fan ba fatfatin ho la’o ain deit. Oinsá ita nia sentimentu karik tenki liu hosi dalan moris ne’ebé moruk hanesan eis multimilionáriu ne’e hasoru? Ema ne’ebé uluk rikasu tebetebes ikus mai sai kiak rabat rai. Dala ruma ita senti moe no labele halo servisu hanesan ne’e. La’os deit eis multimilionáriu mak labele halo nune’e, maibé karik joven ida ne’ebé foin akaba nia estudau mós nia sei senti moe atu halo servisu ne’ebé halo moe tebes ne’e. Maibé la hanesan ne’e ba eis multimilionáriu ne’e, nia bele hases tiha sentimentu moe, baruk, no ta’uk hodi hahu fali nia bisnis hosi kraik. Nia hatene katak bisnis ne’ebé nia halo daudaun ne’e sei la garantia rikusoin no buat susesu ba nia. Maibé dook iha nia fuan laran ne’ebá, nia fiar metin katak ho badinas no motivasaun ne’ebé maka’as, nia sei bele hamrik fali. Iha tempu badak, eis multimilionáriu ne’e sai popular no famozu fali tanba hetan intrevista hosi media nasionál no internasionál. Nia famozu la’ós tanba fa’an paun sandwich ne’e, maibé tanba nia ispíritu luta hodi sai hosi situasaun ne’ebé mukit ne’e.

            Badinas no laran metin ne’ebé eis multimilionáriu ne’e hatudu soi duni atu ema seluk imita. Nia istóris fó lisaun barak. Servisu maka’as no badinas loloos seidauk naton se la tuir ho pasiénsia no hakarak ne’ebé forte.

            Hakarak-forte ne’e mak halo komersiante ne’ebé susesu ho komersiante ne’ebé nia rezultadu servisu baibain deit. Ba ema Xina, kapitál folin boot ne’ebé ema ida iha mak ninia badinas rasik. Kapitál ne’e ema hotu-hotu iha no la presiza fó impresta ba instituisaun sira hanesan banku. Laiha kbiit
ida mak bele hapára hakarak ne’ebé forte hanesan ne’e. Wainhira badinas tau hamutuk ho hakarak ne’ebé forte no haforsa ho pasiénsia, fiar katak sei sai rikusoin ne’ebé folin boot ba ema ne’ebé deit mak hakarak involve-an iha komérsiu. Pasiénsia nudar moruk boot ida, maibé nia fuan midar lahalimar. Laiha dalan ida mak fasil no lais atu to’o ba buat susesu no hetan rikusoin. Ema tenki servisu maka’as no iha hakarak ne’ebé forte no toos hanesan fatuk.

            Karakterístika ne’e mak komersiante Xinéz sira iha tanba ne’e sira bele buka han hemu hosi dader to’o kalan no halo servisu saida deit ne’ebé bele halo osan. Iha komunidadi Xinéz, laiha konseitu kona-ba komersiante nível kraik. Jéneru komérsiu saida deit iha poténsia hodi halo osan.  Fila ba komersiante ne’e rasik mak disidi. Ema Xina iha tendénsia halo komérsiu tanba área ne’e laiha limitasaun espasu, tempu no fatin. Alein livre, área komérsiu mós fó espasu luan tebetebes ba ema hodi dezenvolve nia kapasidadi. Ema Xina gosta halo komérsiu tanba servisu ne’e ezamina kapasidadi rasik no haposível sira atu book-an livre no dalan luan atu ba ne’ebé deit.

            Importanti sira bele fakar forsa tomak no esforsu hodi promove nia komérsiu. Proveitu ne’ebé nia hetan nudar rezultadu hosi nia kosar ben rasik. Hahalok moris hanesan ne’e diak liu duke depende no laran metin ba ema seluk. Ema ida-ida iha direitu atu defini nia destinu, dalan moris, no sira nia futuru rasik. Atividadi komérsiu fó direitu ne’e ba sira. Aranka hosi motivasaun ne’e, ema Xina servisu ho maka’as no hatudu badinas ne’ebé la halimar. Ema ida labele aguenta nia badinas se nia laiha hakarak ne’ebé forte hodi hadia nia pozisaun no nia situasaun moris. Komersiante labele fasil dezanima tanba la to’o atu hetan nia proveitu. Susesu no proveitu tenki uza hanesan motivasaun atu susesu liu tan.

            Imprezáriu Xinéz hotu ne’ebé susesu, sira servisu oras 18 kada loron. Sira hakas-an mantein atu entuziasmu no sira nia hakarak forte tenki manas no lakan nafatin. Tanba ne’e, importanti ba komersiante ida mantein nia karákter badinas no motiva nia ispíritu servisu. Deskansa kleur demais halo ema sai baruk-teen. Servisu maka’as no badinas sei halo ema sai forte liu, fresku, no enerjétiku. Peskizasaun kona-ba saúde, fó prova katak servisu maka’as sei la pertuba ema nia saúde. Maibé, isin sei sai fraku no moras se ema ne’e laiha servisu liu. Sira ne’ebé servisu maka’as la’ós deit mantein sira nia saúde , maibé sai nurak liu duke idadi ne’ebé loloos sira iha. Ne’e duni, asegura atu ita okupadu nafatin no hakonu moris ne’e ho atividadi hotu ne’ebé útil ka iha folin.

            Tuur habaruk-an senti gostu duni. Maibé, atu sai badinas la hanesan ema imajina. Liuliu ba sira ne’ebé book-an iha área komérsiu. Ho solenidadi no hakarak forte ho disiplina ne’ebé maka’as, ema bele muda nia hahalok no lisan moris. Sira tenki programa fila fali sira nia hanoin atu sai badinas, servisu maka’as, hanoin metin, no hahalok pozitivu sira seluk. Laiha lisan, hahalok no karakterístika ne’e, susar ba ema ida atu sai komersiante ne’ebé susesu. Mundu komérsiu nakonu ho kompetisaun no obstákulu. Ema ne’ebé forte hosi parte mentál, neon, no fíziku deit mak bele aguenta kleur iha área ne’e.

            Rezumu ikus, wainhira badinas tau hamutuk ho hakarak ne’ebé forte no haforsa ho pasiénsia, fiar katak
sei sai kapitál ne’ebé folin boot ba ema ne’ebé hakarak involve-an iha komérsiu. Pasiénsia buat moruk boot ida, maibé nia fuan midar lahalimar. Ema Xina iha tendénsia hili halo kontratu tanba área ne’e laiha limitasaun  ba espasu, tempu, no fatin. Alein livre, atividadi komérsiu mós fó espasu ne’ebé luan ba ema atu promove nia kapasidadi. No komersiante Xinéz sira  ne’ebé susesu ona, loron-loron sira servisu oras 18 nia laran.