EMA XINA NIA SISTEMA NEGÓSIU

Maski uitoan no neineik maibe sei tó rohan duni.

           

Atu hahu atividadi komérsiu ema ida labele uza dalan korta. Sira tenki halo preparasaun uitoan antes hahu atividadi komérsiu ida. Komérsiante tenki kumpriende sistema komérsiu nebé lao. Ema Xina dala barak uza sistema  komérsiu  ho orientasaun ba sosa-nain. Ho liafuan seluk, sistema ne’e fó importansia liu ba hasoru ema husi oin ba oin ou  face to face entre komersiante ho sosa-nain no komunikasaun ho ema barak. Ema Xina fiar katak komersiante tenki kria  relasaun nebé metin no halo belun ho sosiedadi. Relasaun ne’e importanti hodi promove nia komérsiu. Se lae, komersiante sei hasoru problema wainhira fan nia sasan. Tanba sosa-nain sira mak defini produtu ida sei iha folin ka lae. Komersiante nebé matenek sei uza sistema komérsiu nebé bele atrai sosa-nain nia hakarak atu vizita beibeik nia fatin ka loja.

            Sistema komérsiu nebé ema Xina iha, la hanesan ho ema Europa nian. Ema Xina gosta liu fokus ba komérsiu ida deit antes dezenvolve tan nia atividadi komérsiu seluk. Ho nune, sira bele domina komérsiu ne’e no bele monopolia nia atu ema seluk susar atu kompete. Sistema nebé sira uza, afinál efikaz no prátiku. Duke koko atividadi komérsiu oioin, diak liu fó atensaun tomak ba atividadi komérsiu nebé prinsipál deit. Ba ema Xina, “maski uitoan no neineik maibe sei tó rohan”,  duke duni tuir  “la hetan  no bele lakon hotu buat nebé iha ona liman”.

            Involve-an iha komérsiu oioin mos la sala buat ida. Maibé tenki halo sistemátku. Kompaiñia boot iha kapasidadi ba buat hanesan ne’e, tanba sira iha jestaun nebé diak no organizadu. Atu domina ekonomia, kompaiñia ida tenki foti asaun hanesan konglomeradu nebé involve iha atividadi bisnis hotu no komérsiu prinsipál. Maibé presiza hanoin, kompaiñia konglomeradu iha istória komérsiu nebé kleur no naruk, hahu hosi kompaiñia nebé jere komérsiu kiik, molok krese sai boot.

            Sistema ne’e ema Xina nia kompaiñia boot sira nebé konsidera kada servisu nudar parte ida husi entidadi bisnis ne’e mos halao. Se kompaiñia hetan lukru sira mos sei hola parte iha lukru refere. Se kompaiñia lakon, la hetan lukru, sira hotu simu konsekuénsia ne’e. Atu hametin servisu nain sira nia fiar, komersiante Xina prepara insentivu hanesan bonus ka prezente anuál nian hodi fó antes Tinan Foun Xina nian. Nune mos ho nesesidadi sira seluk hanesan han-hemu, dala ruma manajer kompaiñia prepara mos ba sira. Servisu-nain sira  sei han hamutuk ho manajer komapaiñia nudar família boot ida. Ho nune, servisu-nain sira la senti katak sira hanesan atan deit. Halo nune, sira mos iha funsaun importanti atu hasae kompaiñia ninia kualidadi servisu.

            Ema Xina uza sistema ne’e kleur ona. Komersiante Xina sira fó importansia liu ba ema nia valor no amizade ho sevisu-nain sira. Sira nebé kleur ona kontinua servisu, atu treinu fali servisu-nain foun sira. Iha ema Xina nia mundu komérsiu, laiha kuak nebé hafahe entre boss no servisu-nain durante sira hatene servisu no funsaun nebé sira tenki halao. Boss labele foti-an no loko-an.  Nia tenki koalia no kria ambiente amizade no konfia malu ida ho ida seluk. Servisu-nain laiha, komersiante labele halao nia atividadi komérsiu ho diak. Se ema ida la halo kontratu, dala ruma ema barak la hetan servisu. Nune mos sosa-nain mak defini atividadi komérsiu ida nia moris no mate. Tanba ne’e, elementu tolu ne’e tenki forma sistema nebé armónia, laiha konflitu, atu asegura kompaiñia ida nia atividadi komérsiu.

           

Rezumu ikus, ema Xina hosik nia sosa-nain sira halo rasik desizaun ka opsaun, no laiha presaun hosi loja ka kompaiñia nain. Fó liberdadi ba sosa-nain no serví sira ho espesiál tebes. Hafoin oferese mos diskontu no fasilidadi kréditu ba sira.