XINÉS NIA FILOZOFIA NEGÓSIU

Komersiante nebé monu sei senti moras,

maibé moras ne’e mak sei halo nia hader no hamrik fali.

            Ema Xina nia tendénsia no involvimentu iha parte komérsiu, laos fasil ba rasa-hosi rai  seluk atu kompete ho sira. Sira iha pekuliaridadi ka matenek espesiál no iha abilidadi rasik nebé halo sira sai grupu komérsiu forte nebé halo amigo ka inimigu respeitu sira. Se haré liu deit, ema Xina hanesan moris mai atu halo kontratu deit. Sira laos iha talentu deit, maibé mos matenek  kontrola buat hotu nebé relasiona ho komérsiu, hahu hosi faze halo negosiasaun tó prosesu fan no maneja osan. Talentu ne’e tuir lolós laos haraik deit ba sira. Ema Xina  simu talentu ne’e liu hosi tempu nebé naruk no tenki hasoru susar oioin iha komérsiu.

            Ema Xina nia istória hatudu katak maioria sira bokan iha área agrikultura ka kaer tos. Iha tempu uluk, komersiante ka kontratu-nain sira la hetan fatin ás iha povu Xina nia let. Sira tur iha estratu sosiál kraik liu tuir estrutura sosiedadi nebé iha tempu nebá kaer metin ba dutrina konfuzionismu. Tuir dutrina ne’e, grupu lisensiadu no sientista sira simu respeitu liu no tur iha irarkia nebé ás liu iha sistema sosiál ema Xina nian. Tuir irarkia ka estrutura sosiál ne’e, sira nebé hetan fatin ás mak empregadu administrasaun liurai nian no militár. Grupu komersiante ema la dun respeitu tanba sira involve iha atividadi nebé buka no foti lukru boot liu. Tanba ne’e, sira nia prezensa ema konsidera nudar opresaun hasoru ema barak. Sira hanoin-an rasik no la ajuda povu.

            Maibé saida mak akontese ohin loron sai oin seluk. Grupu komersiante hetan fatin no funsaun nebé importanti iha povu Xina nia moris. Hafoun fali dutrina konfuzionismu ho ispíritu foun nodi fó anin foun ba ema Xina atu involve-an iha komérsiu. Mudansa sósiu-polítiku iha nasaun Xina obriga ema Xina barak sai ba Ázia Sudeste nodi buka moris no oportunidadi foun. Alein buka moris, sira mos iha mehi boot atu sai riku. Maski buka moris iha ema nia rai laos fasil. Hakarak ka lakohi sira tenki brani hasoru susar no impedimentu oioin. Susar ida ne’e mak haforma neon nebé forte no fó persepsaun foun ida ba ema Xina katak atu sai susesu, sira tenki halo komérsiu ka bisnis.

            Sentimentu la hakmatek no ameasadu fó motivasaun ba ema Xina atu involve-an iha komérsiu. Filozofia no pensamentu konfuzionismu sira kaer nudar mata-dalan hodi transforma sira nia moris no família. Ema Xina fiar katak ho servisu makás  no barani loke oportunidadi foun mak sei halo sira susesu. Susesu ka lakon depende ba ema nia hahalok, esforsu, fiar no hanoin metin. Maski talentu no hakarak mak kaer funsaun nebé importanti iha ézitu atividadi komérsiu nian, se laiha kbiit ida  dudu hosi laran, ema ne’e sei monu, wainhira hasoru problema no tentasaun. Talentu haburas ho rai metan, maibé abilidadi bele aprende liu hosi esperiénsia no kursu. Buat nebé importanti liu, komérsiante tenki iha hahalok nebé sériu no iha komitmentu nodi fó susesu ba nia komérsiu.

            Iha komersiante barak lakon tanba la sériu maibé halo tuir ema seluk deit. Karik iha ema seluk fan sasan, nia mos hakarak halo hanesan. Halo kontratu labele halo tuir ema deit no halo hanesan buat halimar nian. Halo kontratu bele halo hanesan buat nebé ita gosta maibé laos hodi pasa-tempu ka halo kontenti-an deit. Komérsiu nudar kampu servisu nebé sériu presiza fó atensaun tomak, forsa, komitmentu, tempu, no sakrifisiu nebé laos uitoan. Halo kontratu mos nudar buat luta boot ida ba komersiante ne’e nia moris no mate. Halo negósiu hanesan ema ida tenki tuba-netik nia valor moris. Laiha ema ida mos hakarak lakon. Ema nebé uluk monu iha komérsiu deit mak bele senti lolós buat monu ne’e nia moras oin-sa. Senti moe, depresaun, no senti nia dignidadi fokit-an sai hosi nia-an.

            Iha komérsiu, la fasil ba ema nebé monu atu hader ka hamrik fali. Karik bele halo nune, nia sei sai komersiante nebé makás no susesu. Komersiante nebé monu sei senti moras, maibé moras ne’e mak sei halo nia hamrik fali. Destinu labele sai razaun hodi simu buat-lakon iha negósiu. Kada komersiante presiza foti buat pozitivu no aprende hosi nia monu. Sira tenki avalia falta hotu-hotu, frakeza, erru, no frakasu. Sira tenki aprende hosi frakasu sira ne’e hotu. Monu-hader no lakon-manan iha komérsiu nudar dalan nebé komersiante ida tenki liu atu aprende diak liu tan. Esperiénsia ida ne’e mak sei halo nia forte, metin, la fasil nakdoko wainhira hasoru udan no anin boot.

            Ema Xina dala barak hosik hela esperiénsia halo kontratu nian ba sira nia bei-oan. Tanba ne’e, sira introdus oin-sa halo kontratu ba oan sira dezde kiik. Ema Xina fiar, atu sai komersiante nebé tasak no iha kapasidadi, ema ida tenki hahu no aprende hosi kraik. Laiha problema ba ema se deit atu hahu halo kontratu, tantu idadi kiik ka boot; katuas-ferik ka klosan. Laiha limitasun tempu ba ema ida hakarak hahu nia komérsiu. Tanba ne’e, iha ema Xina balu hakarak servisu tinan sanolu resin molok halao nia komérsiu rasik.  Filozofia  komérsiu nebé ema Xina adopta ne’e mak halo sira la hanesan ho komersiante seluk. Alein esperiénsia no matenek nebé sira hosik hela hosi jerasaun ida ba jerasun seluk, forsa ekonómika ema Xina nian mos hatur no kaer metin ba redi  (network) servisu hamutuk nebé halo entre sira.

            Introdusaun nebé fó dezde kiik no hosi kraik kedas, importanti atu kria no hamosu karákter nudar komersiante lolós. Ezersisiu nebé simu kedas hosi bei-ala no ina-aman sira, uza no ajuda hasae abilidadi no koiñesimentu nebé relasiona ho komérsiu. Presiza hanoin, matenek sira ne’e la hetan no domina iha tempu nebé badak. Iha komérsiu iziji pasiénsia no ezamina laran-forte ema ida nian. Maski halo kontratu konsidera nudar dalan hodi sai riku, hetan riku-soin, no sorti ka lukru laos hetan lalais ho maneira fasil. Ema Xina la gosta halo kontratu ho maneira fasil, nebé la hasai enerjia no kapitál. Ne’e laos karakterístika komérsiu nebé ema Xina buka, tanba komérsiu ida hanesan ne’e sei la aguenta kleur. Ema Xina gosta liu hili komérsiu nebé iha kontinuasaun no fó lukru ba sira iha tempu naruk.  

            Iha filozofia komérsiu ema Xina nian, komersiante labele laran metin atu hetan kedas lukru wainhira foin hahu nia komérsiu. Sira tenki prontu atu simu posibilidadi saida deit, hanesan manan ka lakon iha faze foin hahu ne’e. Tanba ne’e, sira tenki iha kapitál nebé forte no fonte finanseiru nebé bele uza durante tempu krize ne’e. Lukru nebé sira hetan la sei uza hodi halo kompras. Karik presiza labele bók. Lukru nebé hetan tenki uza hodi aumeta  ba kapitál servisu nian no halo investimentu. Sei hetan duni lukru maibé depende ba investimentu hira mak halo tiha ona. Nebé tuir lolós, kada komérsiu presiza halo planu ho kuidadu, trata ho lolós, no halo ho fuan-laran tomak.

           


Rezumu ikus, renova fali dutrina konfuzionismu nian ho ispíritu foun  hodi fó dalan ba ema Xina sira atu involve ka hatama-an iha mundu komérsiu. No halo kontratu bele sai hanesan “hobi”, maibé laos atu pasa-tempu mamuk. Lukru nebé hetan, diak liu la uza ba  kompras. Lukru ne’e tenki uza ba kapitál servisu nian hodi halo investimentu.