LISAUN MORÁL NEGÓSIU NIAN

Atu susesu iha kampu komérsiu,

tenki sai komersiante ne’ebé ema fiar,

matenek ba buat komérsiu nian, no la ko’alia barak.

            Ema Xina iha lisaun diak barak ne’ebé ajuda sira nia ézitu komérsiu nian. Lisaun ne’e la’ós rikusoin nudar eransa hosi família balu. Lisaun ne’e aprende hosi esperiénsia wainhira hala’o atividadi komérsiu nian. Iha komérsiu, aspetu sira hanesan produtu, abilidadi  maneira fan (marketing) nudar elementu hotu ne’ebé importanti. Aspetu importanti ida ne’ebé dala barak komersiante sira la konsidera mak kliente ne’ebé fiel. Kliente laiha,
produtu laiha folin. Nune’e mós abilidadi sei la hamosu buat diak ruma se nia la konsege dada kliente nia interese no atensaun atu sosa produ ne’ebé fa’an. Lisaun ne’e mos hanorin komunidadi komérsiu Xinéz  atu serví no tinu kliente hanesan liurai. Kliente nia hakarak tomak tenki atende. Tenki fó atendimentu ne’ebé diak liu ba kliente.

            Kliente ne’ebé satisfeitu sei mai fali, no lori mós kliente foun. Kliente iha funsaun importanti tanba sira mak halo promosaun ba produtu. Kliente mós bele hasa’e no hamonu imajen komérsiu ida nia fatin. Ne’ebé, atu sai komersiante ne’ebé susesu, tenki fó no simu konfiansa hosi kliente sira. Ho fiar no konfiansa ne’e, komérsiu foin bele la’o ba oin. Tanba ne’e, komersiante tenki kria relasaun ne’ebé besik ho kliente no esforsu haburas diak relasaun ne’e. Alein relasaun asuntu komérsiu nian, komersiante mós presiza kria relasaun pesoál ho nia kliente.

            Komersiante tenki iha hahalok amizade, fó atensaun, no dekor kliente nia naran, família, servisu, hela fatin no nia lisan ka kostume. Kliente hakarak trata sira ho respeitu. Maneira ne’e bele hatudu liu hosi atendimentu ne’ebé espesiál no mós hatun sasan folin ne’ebé kliente sosa.
Kliente ne’ebé satisfeitu sei mai fali no sei sai promotor  ba ita nia komérsiu. Hamnasa uitoan no hatudu simpátiku la’ós buat todan. Maski komersiante tenki lakon tempu uitoan. Komersiante labele hatudu hahalok foti-an no hanoin-an deit. Fó prioridadi ba kliente nia interese. Tenki tinu diak kliente nia fuan. Buat la’ós susar atu halo se komersiante bele haré kliente ida nia valor ne’ebé importanti tebetebes ba nia.

            Kliente nudar fonte rendimentu no ézitu. Komérsiu ida atu ba oin ka kotuk depende ba suporta ne’ebé kliente sira fó. Kliente nia pedidu nudar oportunidadi komérsiu nian ne’ebé labele rejeita. Komersiante presiza esforsu atu hakonu ka simu saida mak kliente buka, eseptu nia labele halo tanba kbiit la to’o. Komersiante Xinéz fó prioridadi ba aspetu relasaun ho nia Kliente. Sira sempre hatudu oin midar ba kliente no la hatudu oin hirus karik kliente la sosa sira nia sasan. Direitu no desizaun kliente nian tenki respeitu. Importanti mak kria konfiansa no relasaun  ho kliente hotu.

            Komersiante Xinéz sira fó atensaun liu ba atendimentu kliente. Sira sei esforsu fó atendimentu ne’ebé diak liu ba sira nia kliente. Wainhira sasan ne’ebé kliente hakarak maibé laiha nia fatin, sira sei esforsu fo tulun ba kliente atu hetan sasan ne’e.
Komersiante Xinéz la ta’uk no la kanten atu hasai osan uitoan, sarak sira bele “kaer metin” no atrai kliente nia laran. Tanba ne’e mak, sira la laran todan atu fó atendimentu adisionál hanesan lori kliente nia sasan ba uma la husu selu ka ho pagamentu mínimu. Sira nia objetivu halo nune’e atu kria baze konfiansa entre parte rua.

            Komeriante Xinéz fó importansia liu ba konseitu konfiansa. Sira kaer metin ba promete ne’ebé halo tiha ona. Promesa hotu,  sira sei halo tuir tanba buat ne’e sai nudar baze ézitu asuntu komérsiu ida nian. Wainhira la halo tuir promesa, komersiante sei lakon integridadi no kredibilidadi la’ós deit iha kliente sira oin, maibé mós ba sosiedadi komérsiu. Komersiante Xinéz sei la book ka xateia nia komersiante kompetidor tanba hahalok ne’e kontráriu ho étika komérsiu nian. Konaba morál komérsiu nian ema Xina forte uitoan. Komersiante mós tenki iha morál  se nia hakarak haré nia komérsiu la’o ba oin. Komersiante ne’ebé laiha morál no onestu sei ses no monu mesak. Tuir loloos, lisaun diak atu susesu iha área komérsiu mak sai nudar komersiante ne’ebé bele hetan fiar, fasil trata asuntu komérsiu nian no la ko’alia barak.

            Lisaun diak ne’e haré hanesan fasil hela, maibé la’ós fasil atu hala’o.  Komersiante ne’ebé loos deit mak bele hala’o buat ne’e. Grupu ne’e iha orizonte, vizaun ne’ebé dook. Sira la hakarak atu raut proveitu, lukru ho maneira instante. Sira hakarak harí fundasaun

komérsiu ne’ebé forte nudar fonte rendimentu ne’ebé iha kontinuasaun. Komérsiu nudar sira nia oan rasik ne’ebé sira tenki hosik hela nudar eransa ba sira nia oan no bei-oan sira iha loron ikus. Ida ne’e mak ema Xina nia maneira komérsiu no sira uza lisaun ne’e atu hametin-hanaruk sira nia atividadi komérsiu nia moris. Ba sira, maski hetan rendimentu neineik sarak komérsiu ne’e metin tinan ba tinan.

            Rezumu ikus, atu sai komersiante ne’ebé susesu, sira tenki fó no hetan konfiansa hosi sira nia kliente. Komersiante Xinéz la ta’uk no karak atu hasai osan uitoan sarak sira bele “kaer metin” no atrai sira nia kliente nia laran. Ida ne’e mak lisaun morál negósiu nian ne’ebé ema Xina hetan iha esperiénsia no simu hosi bei-ala sira. Lisaun ne’e hanesan, izempul “talentu dansa” nian ne’ebé oan simu hosi inan-aman hafoin nia koko iha nia moris maski liu hosi prosesu (kompara ho bebé oan nia vídeo iha leten, oinsá ho idadi fulan 12, nia imita ona múzika ne’ebé nia rona).