Moris atu sai oin-sa iha loron ne’e, depende ba ita nia desizaun no reasaun. Prinsípiu ka sigredu ou lei 90/10 buat simples, maibé bele muda ita nia moris iha minutu. Iha ita nia moris, akontesimentu hotu nebé ita labele kontrola iha 10% deit. Ita la hatene bainhira mak kopu ida rahun, aviaun ida monu no ita nia familia ida hetan dezastre ka susar. Oin-sa ita bele kontrola ita nia reasaun rasik hasoru buat sira ne’e?
Loron-loron ema barak tebetebes mak sofre tanba stress. Sira hanesan ema nebé nunka haksolok; nunka hetan susesu. Sira nia loron mohu no liu lét deit ho frustradu, hanoin aat no dezanima. Buat aat deit mak sira halo no akontese iha sira nia moris. Sira nia laran susar halo mohu tempu, lakon sira nia belun diak, no moris laiha ksolok. Buat hotu-hotu laiha ida mak midar. Sira nia moris hanesan fali monster ida nebé hatauk tebes. Ida ne’e mak ita boot nia konseitu moris? Karik nune’e labele tauk. Tanba ita boot bele modifika-an! Kumpriende no halo tuir deit prinsípiu simples 90/10, mak ita nia moris sei sai oin seluk.
Iha dader, ita halo pekenu almosu ho família. Ita nia oan feto, la ho hakarak, nakfila xikra no kafé nakfakar hafoer ita nia kamiza. Ita hamrik no hakilar nia, hafoin hakilar mos ita nia ferik-oan nebé tau xikra mai liu meza ninin. Ita sai husi meza, ba kuartu troka ita nia kamiza. Maibé wainhira fila, ita haré ita nia oan feto tanis, no la han hotu nia pekenu almosu, maski prepara-an ona atu ba eskola.
Rezultadu husi akontesimentu ne’e mak, oan feto sai tarde ba eskola. Ita nia ferik ho ansia ba servisu. No ita tenki lori ita nia oan feto ba eskola ho ita nia kareta. Iha dalan ita labele halai makás tanba tráfiku. Ita hetok tarde liu tan. Ita sai strees liu tan, wainhira ita haluha pasta servisu nian iha uma. Ita hahu ita nia loron ho frustradu, no kontinua hanesan ne’e. Wainhira fila ba uma, ita kumprimentu ita nia ferik-an no oan feto. Sira nain rua oin sei tós, no iha tensaun entre imi.
Saida mak halo ita nia loron ohin sai aat nune’e?
1. Tanba ita nia oan feto halo fakar ita nia kafé
2. Tanba ita nia feto ba eskola tarde no ita tenki lori nia ba eskola
3. Ka tanba iha tráfiku iha dalan, no ita tarde ba servisu
4. Tanba ita hatudu reasaun nebé sala (negativu) hasoru situasaun ne’e
Resposta hotu iha númeru 4. Ita halo foer (hadois) loron tomak ba ita nia-an no ita nia família ho ita nia reasaun. Ita labele halo buat ida ba kafé ne’e, maibé ita bele kontrola ita nia emosaun sira.
Buat hotu bele sai oin seluk.
Kafé nakfakar kona ita nia hatais no ita nia oan feto mata-ben turu. Ita presiza dehan ho mamar, “La buat ida oan, loron seluk tenki koidadu oan doben.” Ita ba kuartu, troka, no prepara sasan sira nebé atu lori ba servisu. Hafoin ita fila ba sala han fatin, ita nia feto hola bensa no ita beijo nia. Fó beijo ba ferik-oan no dehan até logo, ita boot ba servisu, tó sedu iha servisu fatin no ho entuziasmu ható kumprimentu dader-diak ba ita nia kolega sira.
Sena rua nebé hahu ho maneira hanesan. Buat sira ne’e hotu nudar ita nia reasaun konaba buat hotu nebé akontese iha ita nia moris. Ita bele fó sala ba ema seluk. Ita reklama buat hotu nebé sala, maibé buat sira ne’e laiha ida mak ajuda.
Aprende halo reasaun ho diak ka lós, no ita sei la hafoer loron ida mos iha ita nia moris tomak. Karik ema ruma hirus ita, husik sira halo ba. Diak liu la halo reasaun hasoru. Lembra prinsípiu 90/10 no laran labele susar.
Ita nia aviaun kanseladu, no ita nia oráriu hotu sai sabraut. Labele trata aat crew sira iha airoportu. Ne’e laos sira nia sala. Uza ita nia tempu nodi halo buat diak seluk - lé livru ida ka dada lia ho pasajeiru seluk, se mak hatene ho momentu ne’e bele hetan jodoh ka kolega bisnis diak ruma.
Lós katak ita labele kontrola buat 10% sira nebé akontese. Maibé 90% ita mak defini no depende ba ita nia reasaun. Ita hakarak tebes uza prinsípiu 90/10 iha ita nia moris ka hakarak kontra - ita sei imajina oin-sa nia rezultadu. Paz e bem! Gcb
Fontes:
https://www.google.co.id/amp/s/brightside.me/inspiration-psychology/the-simple-of-9010-that-affects-your-whole-life.