Kontradisaun ideia, katak la simu malu, hahu husi rejeisaun PR Señor Francisco Lú- Olo ba lista naran sira nebé AMP aprezenta husi parte partidu CNRT nian nebé tuir vistu PR nian katak naran sira iha lista balu iha prosesu ba tribunál atu provas katak sira involve ka la involve iha aktus korupsaun.
Naran sira nebé tuir vistu PR Lú-Olo, iha indikasaun ba korupsaun, tanba ne'e la soi atu simu knár nodi sai servidores ba povu nudar ministrus.
Impedimentu husi PR Lú-Olo ba membrus CNRT nebé atu asume kargu ministrus ne'e, hetan reasaun makás busi Maun Xanana nudar Prezidente partidu nian. Tuir Prezidenti partiu CNRT nia pontidevista katak aksaun husi PR RDTL kontradisaun ho konstituisaun RDTL. Tanba wainhira Prezidente halo rejeisaun ba ministrus sira, sein iha karta notifikasaun husi tribunal. Tanba ne'e rejeisaun refere frájil no la hatudu PR RDTL ninia neutralidadi.
Hasoru situasaun ne'e, hamosu pro-kontra vis a vis iha parte laloran kraik, povu kiik sira hahu se'e dikur no harabat hirus-matan ba malu atu hatudu sira nia simpatia ba líder nain rua nebé agora daudaun seidauk hatudu sira nia hakarak atu rona malu oin-sa bele hakotu polémika ne'e atu ikus mai la rasta povu kiik ba tahu laran krize 2006, pakote II.
Atu evita krize pakote II ne'e "laloran kraik", povu kiik labele halo runguranga iha tasi-kidun nebé bele hamosu tsunami.
Wainhira "arus-bawah" la hakmatek ka faak mak terseira parte nebé hakarak esplora timor, sira sei tama kedas nodi uza "arus bawah" hanesan sira nia kuda polítika nodi harahun Timor.
Tanba ne'e, ita "arus bawah" aliás povu aileba, tenki koidadu atu la monu ba lasu perigozu husi terseira parte ka "pihak ketiga" nia manobra polítika. Atensaun iha ona indikasaun katak ema liur hatama kilat ba Timor. Ne'e sinal la diak! Entaun povu kiik mak tenki unidadi.
Ikus, Ita nia líderes sira nebé agora se'e dikur ba malu, sira mesak amigo diak no sira koinese malu diak liu duke ita kiik sira koinese sira. Tanba pro-kontra opiniaun entre sira buat normal. CENA hanesan ne'e ita haré dala barak ona. Cena ne'e hotu sira sei buka malu hemu tua-loke champanhia nodi festeja sira nia cena nia finalidadi iha dansa no hamnasa.
Maibé povu kiik la hatene akompainia drama, tanba uza liu sentimentu: emosaun, tanis, hirus, ikus mai lakon sira hanoin no neon, hamonu sira ba tahu laran. Povu kiik keta haluha: Wainhira lafaek rua tata malu no hafoer bé Ó keta koko tama! KARIK Ó ulun tós tama mak Ó sei sai sira nia banquete.
Mai ita hotu kalma, apoiu sira hotu atu ho ulun malirin no maduru atu rezlove problema ho matenek tuir ita lisan no ita nia fiar.
PAZ E BEM!
(Gcb)
Comments
Post a Comment
Hosik hela komentariuiha ne'e