Semana ne'e, fulan Outubru'2025, Parlementu Portugués aprova lei bandu uza burka iha espasu públiku hotu hodi proteje valór fundamentál sira hanesan igualdadi jéneru no seguransa koletiva. Medida ne'e hakarak bandu uzu hatais hotu ne'ebé subar/taka oin-metin iha fatin públiku, inklui estrada no espasu públiku hotu.
Sá Razaun Iha Aprovasaun Lei Ne'e Nia Kotuk?
Atu proteje seguransa públika no garante identifikasaun ba ema sira iha parte seguransa nian. Promove igualdadi jéneru no proteje feto sira ne'ebé bele hetan presaun obrigatóriu hodi uza burka kontra sira nia hakarak, liliu sira nia liberdadi pesoál rasik. Garante transparénsia iha interasaun sosiál hotu no prevene subar oin no subar identidadi.
Embora nune'e lei fó esepsoens ba atu bele uza burka iha: Fatin kultu nian; espasu diplomátika no konsulár; razaun saúde, seguransa, profisaun, arte, divertimentu, ka publisidadi.
Wain-hira Parlementu aprova lei ne'e konsege hamosu reasaun oioin ba desizaun ne'e, katak: Proposta ne’e aprezenta husi partidu Chega no hetan apoiu husi PSD, Iniciativa Liberal, no CDS-PP. Inklui Partidu sira hanesan PS, Bloco de Esquerda, PCP, no Livre vota kontra, ho argumentasaun katak medida ne’e diskriminatóriu no bele hamosu prejuizu relijiozu no kulturál. Iha aprovasaun ne'e PAN no JPP abstenente.
Konsekuênsia Hosi Aplikasaun Lei Ne'e
Indivídu sira ne'ebé viola lei ne'e bele hasoru multa entre €200 to'o €4.000. Ema ne'ebé mak obriga ema seluk atu subar nia oin ka uza burka bele hetan kastigu prizaun to'o tinan tolu.
Ikus, hafoin aprovasaun lei ne'e hamosu debate luan kona-ba liberdade individuál, seguransa, no direitus umanus iha Portugál.
Oin-sá ita bo'ot sira nia hanoin kona-ba lei hanesan bele hamosu iha konteistu Timor-Leste?
Hakuak iha Kristu💖
Comments
Post a Comment
Hosik hela komentariuiha ne'e