ARTE NEGÓSIU

Mundu komérsiu nakonu ho kompetisaun makás ho nia maneira oioin. Tanba ne’e, komersiante tenki prepara-an ho arte defende-an nudar komersiante atu hasoru atake iha forma saida deit no posibilidadi nebé sei mai.

            Ema Xina konsidera komérsiu nudar arte. Atu bele domina ho matenek, ema tenki pasiénsia hodi aprende buat kiik no boot hotu nebé relasiona ho atividadi komérsiu.  Arte komérsiu presiza matenek atu haré ho kuidadu, no la tó atu aprende teória deit. Halo kontratu presiza prátiku no ezije ema fleksivel nafatin. Komersiante tenki matenek adapta ho situasaun no lé merkadu nia hahalok ho sosa-nain nia hakarak. Sira mos tenki hafoun-an tuir tempu nia modifikasaun. Komersiante diak liu labele taka-an. Sira tenki iha koiñesimentu no kapasidadi haré ba dok. Hanesan arte defende-an, atividadi komérsiu labele uza hodi hanehan ka persege ema. Prinsípiu komérsiu hodi tulun ema no selu sira nia kolen mak osan no matéria hosi rezultadu servisu nian nebé hatudu daudaun.

            Arte komérsiu ema Xina nian fó prioridadi ba prinsípiu win-win. Parte rua,  komersiante ho sosa-nain tenki hetan lukru hosi atividadi komérsiu nebé halao. Komérsiu nebé justu, lós no susesu, bele fó satisfasaun ba parte rua hotu. Maibé, se atividadi komérsiu nebé benefisia deit parte ida, atividadi komérsiu ne’e la ekilibriu. Hanesan arte ida, atividadi komérisu iha mos regulamentu hotu nebé nia tenki halo tuir. Nia labele fó interese ba nia-an deit, maibé tenki onestu ba an-rasik no ba ema seluk, iha responsabilidadi, no halo buat nebé diak liu, kompete ho saudável, halo servisu hamutuk se presiza, labele kanten, pasiénsia, no labele hanoin aat. Komersiante nebé la halo tuir regra ne’e sei la hetan fatin iha sosiedadi Xinez nian.

            Ema Xina nudar rasa nebé krítiku. Komersiante nebé halo manipulasaun no bosok sei simu nia konsekuénsia. Nune mos ho komersiante nebé foti-an, loko-an, no la amigavel, kleur ka lalais nia sei lakon hotu nia sosa-nain ka kompradores. Komersiante labele kria kuak ida atu haketak-an ho kompradores. Maibé, kontráriu, sira tenki esforsu kria relasaun amigavel ho kompradores. Jeitu hanesan ne’e laos mai mesak, maibé presiza kadi. Kapasidadi atrai nebé iha komersiante Xinez nudar karákter arte komérsiu Xinez nian nebé konsidera importanti. Maneira nebé sira uza, oferese buat resin barak ba sira nia kompradores iha aspetu hotu, hanesan diskontu, aumenta valor ba sasan nebé sosa, no oferese after sales servis.

            Ho liafuan seluk, komersiante tenki liman kman, simpátiku, tatra sira nia kompradores nudar família no ka belun nebé besik liu. Kria sentimentu hanesan ne’e, kompradores senti katak sira simu antendimentu nebé espesiál. Kada ema sei senti kontenti kuandu nia simu atendimentu nebé diak liu duke seluk. Relasaun amigavel ne’e sei hamoris konfiansa no fiar malu entre komersiante ho sosa-nain. Baibain, ita sei la halo asuntu komérsiu ho komersiante nebé ita la dun fiar. Ita gosta no fasil liu kria servisu ho komersiante nebé ita koiñese ona no bele fiar. Forma arte ida ne’e mak komersiante Xinez sira uza hodi atrai sira nia kompradores. Eskenáriu ida ne’e klarifika tanba sa ema barak gosta liu vizita no kompras iha Xinez nia loja duke seluk. Ema Xina la uza biru, aimoruk, maibé arte komérsiu nebé sira aprende hosi arte relasaun umana ne’e rasik.

            Mundu komérsiu nakonu ho kompetisaun makás ho nia maneira oioin. Tanba ne’e, komersiante tenki prepara nia-an ho arte defende-an nudar komersiante atu hasoru atake iha forma saida deit no posibilidadi nebé sei mai. Komersiante tenki iha rezisténsia nebé forte. Sira nia mentál no ispíritu tenki forte. Nune mos ho hakarak no fiar metin hanesan fatuk-ruin nebé metin la bokan. Se laiha kbiit hanesan ne’e, komersiante sei fasil hemu bé no mout. Kbiit hanesan ne’e mak haketak komersiante nebé susesu no ida nebé lakon. Komersiante nebé domina arte komérsiu bele adapta-an ho mudansa oioin no kresimentu sosiál nebé sei akontese. Komersiante tenki hatene dansa tuir movimentu merkadu. Frakasu atu halo tuir nune sei hamosu hahikus no lakon opotunidadi barak.

            Komérsiu la halo ho maneira narnaran. Eziji ema ida-ida atu hasae nafatin nia kapasidadi. Sira tenki hatene oin-sa kontrola kompradores no hasoru sosa-nain nebé ibun boot. Komersiante la presiza atu sai segidores, maibé tenki hakas-an atu sai líder iha nia área. Líder nebé matenek sei hatene tempu saida mak diak atu nia halo asaun no oin-sa tenki rezolve problema. Iha arte komérsiu Xinez nian, la sai problema se ita lakon ba ema seluk,  halo-an hanesan ema lakon mak ita sei hetan oportunidadi barak liu. Halakon-an la signifika lakon.  Nune mos hakiduk pasu hira ba kotuk, diak liu, duke halo buat ruma ho ansia. Ema nebé hatene no domin arte komérsiu deit mak bele haré efeitu pozitivu husi hahalok ka asaun nebé ema barak haré nudar buat negativu.

            Komersiante tenki sensitivu. Sentimentu bele ajuda komersiante kumpriende forma mudansa saida deit mak akontese iha sosiedadi ka merkadu. Sensu sensitivu importanti no sai hanesan baze ida nebé tenki iha arte komérsiu nia laran. Sira nebé domina arte komérsiu bele lé oportunidadi nodi nakfila situasaun aat ba ba diak. Arte presiza ezatidaun nebé kuidadu, katak kada komersiante tenki foti asaun ho matenek, ezatu, no kuidadu atu la ofende parte seluk nia sentimentu. Komersiante lolós tenki iha amigu barak, laos inimigu ka funu baluk. Sira nebé gosta hamosu ostilidadi, rakut-malu, no kria konflitu la serve atu halo kontratu ka sai komersiante. Grupu ida ne’e la kumpriende arte komersiante, no sira la fó valor pozitivu ba nia atividadi komérsiu. Arte komérsiu importanti tanba buat ne’e nudar indikador atu haketak komersiante nebé baibain no ida nebé laos baibain, ekstra-ordináriu.  

            Rezumu ikus, ema Xina nia arte negósiu fó importánsia ba prinsípiu win-win. Komersiante tenki iha kbiit, mentál, no espíritu nebé forte.