Presiza barani atu transforma-an,
tanba transformasaun laos sempre susesu.
Iha ne’e mak halo ema barak dezanima-rende.
Manu makikit boot ida nia idadi bele tó tinan hitu nolu. Maibé atu tó ba idade ne’e presiza halo opsaun nebé boot. Nia hakarak tinan naruk ka pára deit ho idadi hat-nolu? Desizaun iha nia liman rasik.
Wainhira manu makikit boot ida tama ona ba idadi hat-nolu, atu nia bele moris tan tinan tolu-nolu, nia presiza liu husi transformasaun isin nian nebé halo moras no terus lahalimar. Iha momentu krusiál ne’e makikit boot tenki halo opsaun barani, hakat ba halo transformasaun isin nian, maibé tenki terus. Ou lakohi moras no terus, maibé tenki mate lalais ho tinan hat-nolu deit.
Iha tinan hat-nolu, manu makikit boot nia ibun sai naruk ona tó nia kakorok, tanba ne’e susar atu han. Nia liman kukun mos la kroat ona. Alein ne’e nia liras mos sai mahar liu nune nia labele tan semo ás.
Se nia hili nodi liu husi transformasaun nebé halo terus makás, nia tenki semo ba foho ás ida atu iha nebá nia bele halo nia knúk. Hafoin nia sei tata no baku nia ibun ba iha fatuk atu hasai tiha ibun kulit nebé tuan ona. Wainhira kulit tuan monu sai ona, nia tenki hein ibun kulit foun moris, atu nia bele fokit sai nia ain-kukun tuan ida-idak nodi hein ida nebé kroat mosu fali. Wainhira ain-kukun foun moris ona, nia uza hodi fokit sai hotu nia liras tuan sira no hein liras foun moris. Se nia bele liu hotu ona prosesu sira ne’e, nia bele semo fali hodi halao nia moris hanesan normál. Transformasaun susar tebetebes ne’e mak makikit boot ida tenki halo durante fulan barak atu nia moris naruk tó tinan hitu-nolu.
Lé nain doben sira, oin-sa ita bele tranforma buat ida, se ita rasik la transforma ita nia-an uluk? Se hakarak muda ita nia uma laran, ambiente, sosiedadi, no nasaun atu sai diak liu, buat importanti nebé presiza halo uluk mak ne’e, tenki modifika-an uluk sai ema diak ida. Ita sei halo transformasaun ka la halo, natureza sei halo buat ne’e ba ema atu iha ekilíbriu. Tanba ne’e atu kleur ka lalais sei iha duni mudansa.
Transformasaun halo moras tebes. Maibé sei moras aat liu wainhira la muda-an. Tanba natureza sei obriga ita atu muda ka transforma-an. Laos animál deit, hanesan manu makikit boot nebé temi iha leten, mak bele troka-an, maibé ema mos bele halo nune. Moris ne’e dala barak la lao tuir hanesan saida mak ita hakarak. Dala ruma buat nebé ema planu tiha ona, maibé natureza hases tiha ba dalan seluk nebé iha kuak barak no klean tebes. Maibé, laran labele susar, fiar metin nafatin, tanba iha Kbiit ida mak organiza. Kbiit ne’e ita hanaran Maromak. Nia hatene dalan nebé mak diak liu ba ema atu liu. Ita bele haré realidadi balu deit, tanba ema nia kbiit limitadu.
Timor Leste sei bele duni transforma ba nasaun soberanu no dignu ida iha Ázia - Oseánia, maibé molok tó iha nebá, timor oan ida-ida tenki halo mudansa makás ba nia mentál no an-rasik. Tansformasaun agora lao daudaun, maibé presiza tempu, sakrifísiu, no pasiénsia.