Amo Papa dezapontadu ho sarani, padres, no bispos zaman now nia hahalok wainhira iha misa, sira preokupa hasai uluk mak foto ho smarthphone duke sira buka hakmatek hasae orasaun.
Amo Papa Fransisku, Líder Katólika nebé tur iha Vatikanu, iha ninia omília ida iha semana rua liu ba, husu no apelu ba relijiozu no relijioza atu uza média sosiál hanesan facebook no twitter ho fohok ka matenek. Tuir Amo Papa haré, atividadi iha médi sosiál bele halo relijiozu no relijioza sira iha poténsia ladun tau matan no hases tiha sira nia atensaun hosi obrigasaun konaba moris relijiaun nian. No Amo Papa mos husu atu relijiozu no relijioza sira hosik tiha, katak la kaer smartphone ka mobile matenek ne’e.
Maski Amo Papa mos hatene katak smartphone no tablet nudar instrumentu rua nebé útil tebestebes ba komunikasaun iha era ida ne’e. Maibé, Amo Papa alerta katak wainhira relijiozu/a sira uza instrumentu komunikasaun ne’e la ho matenek mak sei halo sira la tau matan ba malu hanesan irmaun no irman tuir ezijénsia moris komunidadi nian no bele impede no hamate sira nia orasaun no moris kontemplativa nian.
Amo Papa dezapontadu ho sarani, padres, no bispos zaman now nia hahalok wainhira iha misa. Tanba iha misa sira preokupa hasai uluk mak foto ho smarthphone duke sira buka hakmatek no fokus hasae sira nia orasaun. Tuir Amo Papa, uza ka halimar mobile phone wainhira misa nudar hahalok nebé la diak, hatudu izemplu aat. Tanba ne’e, Papa husu atu sériu liu tan wainhira halo orasaun no halao moris Katolika nian.
Iha Papa nia omília (11/8) dehan “ Hau triste wainhira iha misa laran ida ne’e, haré mobile phone barak tebetebes. Hahalok ida ne’e laos deit sarani baibain mak hatudu, maibé mos padres no bispos. Misa laos momentu espetákulu ka hatudu kompetisaun mobile phone. Ne’e duni, wainhira misa laos momentu atu halimar imi nia mobile phone.”
Momentu ne’e, Papa mos husu atu bispos, padres no relijiozu/a sira iha nebé deit, atu hatudu nafatin hahalok hakraik-an no jeitu moris simples. Papa konfesa katak nia triste no dezapontadu wainhira hare padres no relijiozu/ sira moris luxuozu ho sae kareta luxu no uza mobile phone sira nebé karu ho téknolojia ás.
Ikus, situasaun nebé agora rame iha média sosiál konaba “situasaun” Igreja iha Pennsylvania, Norte Amérika, “halo moe no triste tebtebes”, katak Amo Papa. Buat sira ne’e akontese, tanba maneira komunikasaun nebé oras ne’e mudifika tebetebes sivilizasaun umana, buat nebé uluk sigredu tebetebes, oin loron laiha tan ida mak bele taka metin. Ne’e duni, apelu husi Amo Papa iha leten, katak tenki matenek uza téknolojia iha iha era ida ne’e presiza tebetebes atu ita hotu reflete, liu-liu ba relijiozu/a ka partes igreja nian nebé hetan apelu espesiál husi Santu Padre. Iha fiar no laran metin, ita tomak hakruk nodi simu Amo Papa nia apelu hodi hateke ba ita fuan, uma laran, komunidadi, sosiedadi no Igreja hodi husu: saida mka ita tenki halo?
Comments
Post a Comment
Hosik hela komentariuiha ne'e