TIMOR NOW HATENE - Joven ida tama ba kafetaria, nia prefere hemu kafé. Tur la kleur nia kafé mai. Wainhira joven né atu goza kafé nia goztu, menina oan ida hakbesik ba oferese aifuan nebe nia fan, “Sosa aifuan maun?”
Ho simpatía joven nebé han hela ne’e, hatan, “Lae alin, deskulpa, hau la sosa”.
Menina oan né la dezamina, maibe nia hein to joven né hemu nia kafé hotu, hafoin nia hakat ba, dala ida tan nia oferese nia aifuan né, “Maun la hakarak, ai-fuan ka?”
Joven né mos ho
hamnasa uitoan nia hatan, “Lae alin, karik hau la sosa.”
Hafoin joven né hamrik ba kasir selu nia kafé, no sai hosi kafetaria ne’e. Menina oan né lori nia ai-fuan lao tuir hosi kotuk. Durante loron tomak nia fan aifuan nebe nia pai kú hosi sira nia tos. Nia esforsu makas, la hatene moe.
Menina oan né hanoin , “Hau koko oferese tan fali hau nia aifuan ba maun né. Se mak hatene nia ka’an hela, maibe finji deit lakohi sosa.”
Sa mak menina oan né halo la ho kolen, atu ajuda nia pai hodi sira bele sustenta sira nia moris nebe simples.
Wainhira joven ne’e sai hosi kafetaria, menina oan ne’e hakbesik ba dala tolu hodi oferese aifuan nebe nia fan, “Maun sosa hau nia ai-fuan?”
Iha biban ida né joven né senti moe uitoan atu rejeita menina oan né nia esforsu. Hafoin nia hasai $2 hosi nia karteira no fó ba menina oan né hanesan ezmola deit.
Joven né dehan, “Alin, simu osan né. Hau la sosa alin nia ai-fuan. Osan né hanesan ezmola ida hosi hau.”
Menina oan né simu osan nebe joven né fo, hafoin menina oan fo fali osan né ba mendikante nebe husu hela dadaun ezmola. Haré menina oan né nia hahalok, joven né hakfodak tebtebes.
“Eh labarik ida né nusa? Ita fo osan ba nia, maibe nia fo fali ba ema seluk?”
Joven né dehan, “Nusa alin fó fali osan né ba mendikante né? Nusa alin la uza osan ne’e?”
Menina né ho oin midar hamnasa, dehan, “Hau promete ona ba pai iha uma katak hau tenki fan pai nia hudi né, laos mai sai fali mendikante... No hau orguilu, wainhira fila ba uma hasoru hau nia pai, nia sei kontenti tebtebes tanba hudi hosi ami nia tos rasik, hau bele konsege fan hotu. Hau nia pai la haruka hau atu sai mendikante nebe lao atu husu osan ba “astuka sira “ iha daldalan”.
Joven né hakfodak no admira tebtebes ho menina oan fan ai-fuan né nia lia fuan hotu. Oin-sa menina oan ho idadi kik hanesan né iha ona étika servisu, katak “servisu nudar onra no serví ho dignidadi”. Menina oan né nia dignidadi sei monu iha nia pai nia oin, se nia la hakas-an no konsege fan hotu nia pai nia ai-fuan sira. No nia pai hakribi tebes se nia oan sai fali mendikante. Devez enkuandu, nia hakarak haré nia pai-maen hamnasa ho oin midar, wainhira nia fila hosi nia servisu hanesan ema fan ai-fuan nebe halo servisu ho digna no bele hetan osan hosi hikis kosar ben.
Ikus mai, joven né sosa hotu kedas menina oan né nia ai-fuan. Laos tanba kasian, ka hamlaha, maibe tanba nia bele aprende hosi menina oan né ninia prinsípiu, “Servisu nudar onra no serví ho dignidadi”. Nia bele hetan osan ho orguilu se nia halao ona nia servisu ho diak no responsabilidadi.
Paz e bem!
(Gcb)
(Gcb)