Iha lilin hat lakan hela, ida-idak nabe'en daudaun. Ambiente hakmatek lós, ema ida mós la iha ne'ebá. Lilin sira ko'alia ba malu, ida primeiru dehan: "Hau mak dame. Maibé ema la kuidadu hau; tanba ne'e diak liu hau mate deit!" Nune'e nia nabe'en daudaun.
Lilin da'rua mós dehan: "Hau mak Fé; maibé kasian hau la vale tan ona. Ema lakohi kuiñese hau, la útil ona, nusa mak hau hakarak lakan nafatin." Ko'alia seidauk hotu anin hu'u mate nia.
Ho laran triste lilin da'tolu mós ko'alia: "Hau mak karidadi. Hau la aguenta tan ona atu lakan nafatin. Ema la haré no valoriza hau. Sira laran moras-malu, aat liu sira laran-moras ema ne'ebé hadomi sira ka sira hadomi, maski sira sira hotu mai husi ran fukan ida."
Derepenti labarik feto oan ida tama ba kuartu, nia haré lilin tolu ne'e mate hotu ona. Tanba tauk nakukun, nia dehan: "Hei sa mak akontese?! Nia hakilar. Imi tenki lakan nafatin, hau tauk nakukun!!" No labarik ne’e mós tanis maka'as.
Hafoin lilin da'hat ho laran dodok dehan: Labele tauk!! Tanis halo sa?". Wain-hira hau sei iha no sei lakan, ita sei bele halakan beibeik nafatin lilin tolu seluk, tanba: "Hau mak esperansa, laran metin."
Ho matan be'en nakonu, menina oan ne'e foti lilin esperansa hodi halakan fali lilin seluk ne'ebé mate.
Buat ne'ebé la mate mak esperansa ne'ebé iha ita nia fuan laran. Espera katak ita bele sai instrumentu hanesan menina oan ne'e, iha situasaun sai deit nia bele hamoris fali fé, dame, karidadi ho ninia esperansa.
Moris ne'e la'os atu naroman hela deit, dala ruma iha anin ne'ebé hú, hodi hamate tiha ita nia "lilin" sira. Iha situasaun no kondisaun susar oin-sa ba mós, ita labele lakon esperansa, liu-liu esperansa ba Nai Maromak Santu Liu-Sira Nain Tolu-Ida Deit. Tanba ho esperansa, fiar ba Maromak katak ita bele iha kbiit atu hamrik fali hodi kaer ita nia lilin hat ne’e hodi la'o ba oin. Tanba iha ne'ebá Nia hein Ó.