Iha momentu mane ida, ho laran triste, telefone ba Norman Vincente Peale, autor livru: “The Power of Positive Thinking”. La iha tan buat ida mak nia iha ba nia moris agora ne’e. Norman konvida mane ne’e ba nia servisu fatin.
“Buat hothotu lakon tiha ona. La iha esperansa tan,”tenik mane ne’e.
“Agora hau moris iha nakukun laran ne'ebé klean tebes. Hau nia moris ne’e lakon tiha ona”.
Rona mane ne’e nia lamentasaun sira, Norman hamnasa uitoan ho simpatia. Hafoin dehan: “ Mai ita estuda lai ita boot nia situasaun”, Norman ko'alia hodi hakalma nia.
Norman foti papel mutin ida, hafoin dada liña ida iha klaran hodi fahe papel ne’e ba parte rua. Norman husu ba mane ne’e atu iha parte liman-karuk nia hakerek buat sa deit mak lakon tiha ona husi nia moris. No iha parte liman lós, nia hakerek buat restu sa deit mak sei hela ho nia.
Ho oin triste ne'ebé kle'an, mane ne’e dehan:”Ita la presiza hakerek iha parte liman-lós. Tanba hau la iha tan buat ida ona.”
“Entaun desde horbainhira mak ita boot fahe malu ho ita boot nia fe'en?” Norman husu.
“Ah hau la kumpriende, ita dehan sa? Hau la fahe malu ho hau nia fe'en. Hau nia fe'en hadomi tebtebes hau!”
“ Ah se nune’e furak tebtebes,” Norman hatan ho entuziásmu.
“Mai ita nota ne’e hanesan númeru da’uluk iha parte liman lós, fe'en ne'ebé hadomi ita tebtebes.”
“Pois hahu horbain hira mak ita boot nia oan tama kadeia?”
“Ah ita sala boot. Hau nia oan la iha ida mak tama kadeia!”
“Diak, ita hatama iha parte liman lós hanesan númeru da’rua, ita boot nia oan sira la iha ida mak iha kadeia laran.” Dehan nune’e, Norman mós hakerek daudaun iha papel.
Hafoin ho pergunta sira ne'ebé ho intonasaun hanesan ne'e, ikus mai mane ne’e kumpriende sa mak Norman husu ba nia, no nia mÓs hamnasa ho nia-an rasik.
“Se wain-hira ita hanoin ho maneira hanesan ne’e, buat hotu la'o ho furak tebtebes‼” Mane ne’e hateke ba Norman ho oin midar no kma'an lós…
Moris mak hanesan ne'e, wain-hira ita dezanima ita hanoin buat hotu-hotu lakon tiha ona. Esperansa ba moris mÓs la iha ona. No a'at liu, wain-hira iha dezanima laran hanesan ne’e, ita hanoin: "Ah Maromak mÓs mate tiha ona." Momentu hanesan ne’e, Maromak hakbesik-An mai dehan: "Belun hau mak ne’e."
Iha situasaun hanesan mane ne’e, buat simples balu ne'ebé ita presiza halo, mak ne'e: Loke matan no se’e tilun ba ema seluk. Tanba husi ita nia ambiente: Maromak ko'alia mai ita.
Fontes: https://www.goodreads.com/author/show/8435.Norman_Vincent_Peale).