Wain-hira manu tolun sira ne’e hafera-an, sai manu oan sira ne'ebé boot ba daudaun hanesan manu oan baibain. Maibé wainhira manu inan haré ba nia sira ne'ebé halibur hela, nia haré manu oan ida mak la hanesan ho manu oan sira seluk. Manu inan ne’e dehan, “Ah afinál….nia ne’e makikit boot ida nia oan.”
Manu inan ne’e hadomi makikit oan ne’e hanesan hadomi nia oan rasik. Makikit oan ne’e nia fó han, kuidadu, no hanorin hanesan manu oan sira seluk. Makikit oan ne’e krese ho kostume hanesan manu oan baibain. Nia halai ba-mai, hamnasa hamutuk ho manu oan sira seluk, no dala ruma nia kiki-ri hanesan manu oan sira seluk mós.
Loron ida manu inan ne’e, husu ba makikit oan atu sira nain rua la'o halimar ba lágoa ida nia be'e hakmatek lós. Sira nain rua hemu be'e ne'ebé fresku-lós. Hafoin manu inan dehan, “ Hau nia oan, agora mak tempu ne'ebé lós hau atu hatete buat hotu ho lolós kona-ba Ó.” Makikit oan ne’e hakfodak tebetebes hodi husu, “Ama atu dehan sa?”
“Hau nia oan, Ó ne’e makikit ida, Ó la'os manu baibain hanesan hau ho Ó nia maun-alin sira seluk ne'ebé sempre hamutuk dezde ki'ik. Ó nia inan hau ne’e, kuidadu Ó dezde ki'ik, tanba wain-hira hau la'o hetan manu tolun ida, hafoin hau foti hodi lu'ut no fera manu oan ida sai hanesan Ó agora ne’e.”
Makikit oan ne’e mÓs tanis maka'as wain-hira rona istória husi nia inan ne'ebé hadomi nia to'o oras ne’e.
Hafoin manu inan ne’e kontinua ko'alia, “Ita moris mai hanesan manu ne'ebé la hanesan, maibé ita hadomi malu la haré ba fulun no la iha diskriminasaun. Ó nia inan hau, hadomi Ó, tanba ne’e hau tenki hatete lolós ba Ó atu Ó hatene lolós se mak Ó nia-an ne'ebé lolós.”
Hafoin manu inan ne’e hakuak makikit oan ne’e hodi haleno-an iha be'e lágoa ne'ebé hakmatek ne’e. “ Hau nia oan haré ba, ita la hanesan.”
La'o daudaun ba hodi hakbesik ba buka loron manas, manu inan dehan, “Haré mÓs ba ita nia lalatak ne’e. Ó hanesan makikit ne'ebé bele semo a'as, la hanesan ami ne’e.
“Hau nia oan, agora Ó bele ba ona. Ba hamutuk ho Ó nia maluk makikit sira seluk. Atu Ó bele semo ba ne'ebé deit tuir Ó hakarak, no sai makikit ne'ebé soi duni ba maluk sira. Keta haluha, katak: "Ó nia inan hau sempre hadomi Ó, no ami loke odamatan nafatin ba Ó wain-hira ho hakarak fila hanesan makikit boot ida,” dehan nune’e manu inan ne’e mata-be'en monu ba rai.
“Ama, obrigadu barak tanba kuidadu ona hau, fó han hau no hanorin hau. Todan tebes ba hau atu husik hela ama, maibé hau tenki ba atu hau bele semo hanesan makikit boot ne'ebé lolós. Loron ida hau sei fila fali mai. Hau husu nafatin ama nia orasaun,” dehan nune’e nia tanis daudaun, hafoin nia semo ba hamutuk ho makikit boot sira seluk.
Loroan ida, makikit oan ne’e mÓs fila fali mai hanesan makikit ida ne'ebé forte lahalimar, bele semo iha leten a'as ne'ebá, no halo kontenti nia ama, manu inan ne’e. “Hau nia oan, hau orguillu ba Ó,” nia dehan iha nia laran, hodi hateke daudaun ba loron leten hodi haré makikit boot ne’e nia kbiit no nia matenek.