Joven ida tur hanoin nia futuru. Nia hahu husu barak konaba saida mak futuru no oin-sa atu hetan. Nia la hetan resposta ida nia mos hamrik no hahu lao. Nia lao ba jardin no haré avó mane ida tur hela iha banku jardin nian. No nia hanoin karik avó ne’e bele responde saida mak nia hakarak hatene. Nia hanoin katak avó nebé katuas ona klaru iha esperiénsia barak no haré futuru ho klaru mos. No nia lao neineik hakbesik-an ba no hasé avó ne’e no hafoin nia tur iha avó ne’e nia sorin. Nia fiar katak nia sei hetan resposta ba buat nebé nia buka, nia hahu loke koalia.
“Klaru katak avó hakat liu esperiénsia barak ona, no wainhira hanesan joven avó hatene ona avó nia futuru. Karik hau bele hatene, saida mak futuru ne’e no oin-sa atu hetan nia? Hau hatete lolós ba avó katak hau bingun fali ho hau nia futuru.”
Ho hamnasa hahaek uitoan avó ne’e hatan, “ Hau mos uluk joven hanesan Ó, no wainhira hanesan joven, hau mos senti bingun ho hau nia futuru no oin-sa atu hetan nia. Uluk hau iha tendénsia ida tur hodi hanoin hau nia futuru, nebé halo hau laran susar, no lakon tempu barak hodi hanoin hela deit saida mak futuru ne’e. Loron ida, hau hahu hatene katak buat futuru ne’e laos buat nebé tenki halo laran susar, maibé buat ne’e halo laran susar liu mak oin-sa hau bele moris iha loron ohin.”
“Laos buat futuru ne’e nudar buat importanti ida no tenki hahu hanoin agora?” Joven ne’e husu fali.
Fihir ba joven ne’e, avó ne’e hatan: “Ó dehan lós joven. Futuru katak buat nebé importanti. Maibé karik Ó nunka hanoin, katak ita laran susar tebes ba futuru, ba buat nebé seidauk klaru, maibé ita haluha ba loron ohin nebé iha ita nia oin. Sein ita hatene katak lolós buat ida futuru ne’e nunka iha, no buat nebé ema barak koalia no hanaran futuru, lolós mak tempu ohin.”
Joven ne’e husu fali. “Tanba sa avó hatete nune’e?”
“
Joven, tuir Ó hanoin, bele ka lae buat ida futur ne’e sein loron ohin? Futuru laos fuan nebé mai husi loron ohin nian? Durante hau nia moris tó ohin loron, ikus mai hau hatene lolós katak loron ohin mak hau nia futuru. Tanba ne’e, hau halo buat hotu-hotu ho diak no halo buat nebé diak liu ba loron ohin, tanba aban hau la hatene hau sei moris ka lae.” Hafoin isplika hotu, avó ne’e lakon husi joven ne’e nia sorin.
Joven, tuir Ó hanoin, bele ka lae buat ida futur ne’e sein loron ohin? Futuru laos fuan nebé mai husi loron ohin nian? Durante hau nia moris tó ohin loron, ikus mai hau hatene lolós katak loron ohin mak hau nia futuru. Tanba ne’e, hau halo buat hotu-hotu ho diak no halo buat nebé diak liu ba loron ohin, tanba aban hau la hatene hau sei moris ka lae.” Hafoin isplika hotu, avó ne’e lakon husi joven ne’e nia sorin.