Se mak fó ezmola boot liu, sorte barak mak sei tama.
Komersiante Xinéz maioria iha modun ne’e be konservativu. Maski hakré agresivu wainhira hala’o asuntu komérsiu ida, maibé sira sei kaer metin ba lisan no hadera-an nian. Komersiante Xinéz baibain taka kadernu iha fulan ikus tinan tuan nian. Bele dehan komérsiu ida iha lukru wainhira taka tinan tuan ho suran nia proveitu hotu. Komersiante Xinéz sira, loron tolu antes tinan foun, sei taka hotu sira nia tusan. Ema Xina la rekomenda atu selu tusan wainhira hala’o hela festa Tinan Foun Xina nian. Tusan nudar sinál la diak. Komersiante ne’e be bou tusan sei la simu sorte iha tinan foun mai.
Ne’e duni, atu asegura komérsiu bele la’o ho diak, tusan tenki rezolve tiha. Karik lae, rendimentu ne’e be hetan labele konsidera nudar proveitu ne’e be moos. Ema Xina kaer ba konseitu promesa ne’e be tenki halo tuir no tusan tenki rezolve tiha. Tusan halo komersiante barak hasoru frakasu no monu. Ema komersiante iha tusan ne’e buat baibain. Maibé, tusan tenki selu, la’os bou hamutuk hodi halo fali osan cash labele sirkula ho diak. Relasaun entre komersiante ida ho ida seluk hanesan simbioze, katak presiza no dependente ba malu. Wainhira komersiante ida hasoru problema, komersiante seluk sei ajuda nia problema. Iha ema Xina nia rede komérsiu, komersiante sira tenki fó liman nodi tulun malu. Halo nune’e atu selu tiha tusan tuan molok foti fali tusan foun.
Iha loron Xina nia Tinan Foun, loja no fatin komérsiu sei taka. La diak ba ema Xina selebra fali festa iha loja ka servisu fatin. Festa Tinan Foun Xina nian, tenki halo hamutuk ho uma laran no família, la’os ho servisu nain sira. Komersiante tenki iha toleránsia no laran diak, liu-liu iha loron boot ne’e. Karik komérsiu hetan lukru, sira tenki fó angpau ka bonus ba servisu nain sira. Ema Xina fiar katak se mak fó angpau boot liu, proveitu barak mak sei tama. Hetok ema laran diak, nia sorte hetok mai barak. Bonus ka angpau sei fó motivasaun ba servisu nain sira atu servisu ho maka’as liu tan. Karik fó férias, sira sei deskansa molok hahu fali nia komérsiu. Ema Xina sempre hein selebrasaun Tinan Foun atu hahu moris foun iha sira nia komérsiu. Ema Xina sempre laran-metin katak sorte sei halis ba sira iha Tinan Foun. Sira sei taka komérsiu durante selebrasaun la’o. Balu férias loron tolu no balu fali bele to’o loron lima. Jeralmente, loron lima mak férias ne’e be kleur liu ona ba ema ne’e be halo komérsiu. Maibé, ohin loron kostume ne’e komersiante sira la halo tuir ona. Iha loron primeiru selebrasaun Tinan Foun nian, la rekomenda ema ida atu loke loja. Se hakarak loke fali nia komérsiu, tenki hein loron rua ka tolu depois. Sira ne’e be loke loja iha loron selebrasaun Tinan Foun nian, kategoria nudar komersiante ne’e be kaan-teen no karak-teen. Ema Xina fó importánsia ba osan, maibé la’os grupu ne’e be bulak osan.
Loke atividadi komérsiu iha Tinan Foun, sempre hahu ho sunu painsol. Nia objetivu atu duni sorte la diak no ispíritu aat. Painsol sei lori sorte no hafoin sunu tiha, sei tuir kedas ho rítu orasaun nian atu hetan tulun no bensaun hosi Maromak. Ema Xina fiar, alein matenek no planu, ho sevisu maka’as, destinu mos iha funsaun ne’e be sufisiente domina hodi difini atividadi komérsiu ida sei susesu ka lae. Iha Tinan Foun, sira aproveita biban ne’e hodi soe hotu sorte la diak ne’e be perturba sira nia moris. Momentu ne’e sira hariis ho derok siin no halo orasaun hodi husu tulun. Sira adora Maromak rikusoin nian ne’e be hanaran Tsai Shen Yeh. Maromak ne’e sira adora iha selebrasaun kada Tinan Foun nian.
Alein ne’e, ema Xina mos fiar katak halo karidadi no fó ezmola ba ema kiak sira, sei halo komérsiu la’o ba oin. Tanba hanesan ona lisan ba komersiante Xinez, mak objetivu ba ajudu ne’e sira foti hosi lukru ne’e be sira hetan. Ajudu ne’e tenki halo ho hakarak no laran moos. Komersiante iha responsabilidadi sosiál hodi tulun sira ne’e be susar no mukit. Wainhira sira hala’o responsabilidadi ne’e, sira sei simu sorte barak. Grupu komersiante hanesan ne’e sei atrai ema barak atu gosta nafatin sira. Sira sei hetan suporta hosi komunidadi no buat hanesan ne’e loloos ajuda sira nia susesu no komérsiu nia progresu.
Komersiante labele hasai liafuan aat wainhira hahu nia komérsiu ho faze foun. Sira tenki ko’alia liafuan diak, hanoin pozitivu, no iha fuan-laran ne’e be moos. Iha Tinan Foun Xina nian, komersiante labele hirus tanba hahalok ne’e sei satan netik nia sorte. Hadera-an ne’e lójiku duni,
tanba ema ida sei la hakarak hirus iha loron no fulan ne’e be diak ne’e. Komersiante ne’e be amigável, oin midar, no kontenti sei motiva ema barak no kliente mai iha ninia fatin komérsiu. Kostume ne’e be ema Xina prátika ne’e la’os buat tradisionál, maibé iha ninia fundamentu no iha kontein rasionál. Nia objetivu ida deit, mak ne’e asegura komérsiu atu kontinua krese ho maka’as no fó rezultadu susesu nian iha Tinan Foun ne’e be sei lori esperansa ne’ebe boot liu tan. Komersiante tenki tau esperansa ne’e be aas ba nia komérsiu. Laiha esperansa, laiha folin mos ba ema ne’e be hala’o negósiu.
tanba ema ida sei la hakarak hirus iha loron no fulan ne’e be diak ne’e. Komersiante ne’e be amigável, oin midar, no kontenti sei motiva ema barak no kliente mai iha ninia fatin komérsiu. Kostume ne’e be ema Xina prátika ne’e la’os buat tradisionál, maibé iha ninia fundamentu no iha kontein rasionál. Nia objetivu ida deit, mak ne’e asegura komérsiu atu kontinua krese ho maka’as no fó rezultadu susesu nian iha Tinan Foun ne’e be sei lori esperansa ne’ebe boot liu tan. Komersiante tenki tau esperansa ne’e be aas ba nia komérsiu. Laiha esperansa, laiha folin mos ba ema ne’e be hala’o negósiu.