Seksu nu’udar oferta ka prezente hosi Maromak.
Papa Fransisku ko’alia kona-ba domin nia kdi’ak
ne’e be mai hosi hakarak, no soe pornografia.
Seksu la’os buat tabu ka bandu, maibé liu-liu nu’udar “prezente hosi Maromak” ne’e be halo atu hatudu domin no kontínua kria moris. Papa ko’alia nune’e hodi krítika pornografia iha parte industria nu’udar buat la los, sala dalan. Katak iha bisnis ne’e uza seksu hodi hetan lukru.
Seksualidadi, seksu, nu’udar Maromak nia grasa. La’os bandu ka tabu, Papa Fransisku ko’alia ne’e ba grupu joven sira hosi Dioseze Grenoble-Viene iha Fransa iha loron Segunda Feira (17/09). Komentáriu ne’e nu’udar resposta ba joven idade 16 ne’e husu maneira oin sá hala’o moris iha mundu ne’e be “hafoer” ema nia isin.
Domin entre mane ho feto ida, wainhira iha hakarak ona, nudar dalan ne’e be lori ita ba oferese ita nia moris tinan ba tinan. Rohan laek. Desizaun ida ne’e halo ho hakarak nodi intrega isin no klamar ba dalan moris hamutuk ne’e.
Amo Papa Fransisku mós krítika pornografia nu’udar industria ka bisnis la los. Tanba liu hosi bisnis industria ne’e sira hasees tiha seksualidadi ninia kdiak hosi domin ne’e be loloos.
Amo Papa motiva joven sira atu salva-guarda sira ninia seksualidadi ho diak no prepara domin ne’e nu’udar buat kdiak ne’e be sei sai parte ida hosi sira nia moris tomak.
Igreja Katólika hanorin katak relasaun seksuál bele halo entre laen ho fen deit. Tanba ne’e Igreja Katólika bandu atu feto ho mane la halo seksu molok tama ba kazamentu.
Timor Leste ikus-ikus ne’e iha inan-nurak barak soe sira nia bebé iha fatin-fatin: iha baleta, iha lixeira no motan. Bebé sala-laek ne’e be moris hosi feto ho mane ida nia hakarak malu. Maibé iha realiadadi sira nia hakarak malu ne’e hodi bosok malu deit. Tanba ne’e inan ho aman ne’e sai fali asasiniu ran-malirin (pembunuh darah dingin) ba bebé ne’e be la bele defende-an. Ne’e duni, sá mak Amo Papa ko’alia ba joven sira iha Fransa vale mós ba ita nia joven Timor oan sira.