Atu hetan ikan boot, ita tenki prepara iska no kail ne’e be diak.
Ema Xina la fó importánsia ba infeita fatin komérsiu parte laran nian. Espasu hotu ne’e be iha fatin komérsiu, tenki prienxe ho sasan, labele hosik mamuk. Loja ka fatin komérsiu mak deskreve katak atividadi komérsiu iha fatin ne’e átivu ka pásivu, la’o ka la’e. Kada sala tenki fó imajen katak atividadi komérsiu la’o ho diak. Iha loja balu fó importánsia liu ba infeita uma ka loja laran, tan ne’e haluha tiha aspetu sira ne’e be iha relasaun ho kualidadu produtu, atendimetu, sosa-nain nia hakarak, valor ema nian, no lokalizasaun. Laiha utilidadi se fatin komérsiu ne’e ninia aparensia furak los no hakonu ho móveis ne’e be karun, maibé failla atu hakonu kleinte nia hakarak.
Parte laran infeita ho furak tebetebes sei laiha signifikadu se kliente sira simu atendimentu ne’e be la diak no kro’at. Nune’e mos se lokalizasaun komérsiu la lokaliza iha zona no pozisaun ne’e be estratéjiku, la sei dada sosa-nain ka kliente maski infeita ho furak tebetebes. Fatin tenki fasil atu vizita, atu kontaktu, no buka. Iha komunidadi xinéz, fen shui iha funsaun importanti hodi difini komérsiu ida nia ézitu ka faillansu. Fen shui nudar buat fiar nian ne’e be la’os bosok hanesan ita kumpriende. Fen shui laiha relasaun ho superstisaun ka mitu. Fen shui nudar jéneru siénsia no jeógrafu ne’e be ema Xina uza hodi detekta rai, fatin halo atividadi komérsiu no fatin harí uma ne’e be kompatível.
Fatin ne’e be diak sei dada vizitante barak. Fatin ne’e be la diak sei lori sorte ne’e be la diak mos ba nia nain no ema sira ne’e be hela. Lokalizasaun ne’e be iha Fen shui diak, importanti ba ema se deit ne’ebe hakarak hahu komérsiu. Fen shui ne’e be diak tenki fó atensaun mos ba anin no bee nia dalan. Asuntu ne’e importanti atu realiza ekilibriu ka tato’an entre yin no yang. Substansia rua ne’e iha situasaun ne’e be kontráriu no sai baze armonizasaun ba ema nia moris. Fatin komérsiu ne’e be iha fen shui diak iha panorama ne’e be luan no la lokaliza iha zona ne’e be nakukun no laiha ema ka la rame. Diak liu evita buka fatin komérsiu ne’e be lokaliza iha dalan-sorun ka kruzamentu.
Lokalizasaun komérsiu tenki hateke ba dalan boot no laiha ai-hun boot, foho, no edifisiu aas seluk ne’e be helik netik. Tenki iha anin dalan tama ba fatin komérsiu. Se lae, sei iha perturbasaun ba ekilibriu entre elementu yin no yang. Loja laran ka fatin komérsiu tenki iha naroman ne’e be sufisiente, no labele hosik iha kondisaun nakukun. Fen shui ne’e be kompatível sei halo sira ne’e be tama ba fatin ne’e sei senti haksolok no animadu. Fen shui ne’e be aat sei halo ema ne’e be hela iha fatin senti kolen no la animadu. Odamatan tama ba loja ka fatin komérsiu tenki nakloke luan.Odamatan tama ne’e be klot, sei difikulta osan atu naksulin tama.
Komersiante Xinez sira fiar katak kor iha loja laran mos iha funsaun importanti hodi ajuda promove sira nia komérsiu. Tan ne’e, ema Xina gosta hili kor naroman hanesan fundu ka background ba sira nia fatin komérsiu nian. Ema Xina la gosta sasan ka movéis ne’e be barak tanba bele taka fali anin dalan tama sai nian. Iha loja klaran tenki hosik mamuk no luan atu ema bokan ba mai. Sasan iha armáriu tenki hatur iha ninin no hateke ba odamatan tama nian, atu vizitante sira fasil mai haré atividadi komérsiu ne’e be la’o. Ho nune’e, bele fó fiar ba vizitante no ema barak ba loja nain nia komérsiu.
Nune’e mos iha komersiante Xina balu ne’e be hatur sira nia maromak nia estátua no animál ne’e be sira fiar bele fó sorte, maibé fiar ne’e loloos laiha baze sientífiku ida. Manduku osan mean ne’e be ho ibun nakloke-luan nudar estátua ne’e be ema Xina nia favoritu mos. Iha manduku ne’e nia ibun, sira sikat tama hela osan antigu balu, nebé sira fiar bele dada osan tama ba fatin komérsiu ka loja laran. Halo nusa ba mos, iha prátika fen shui lokalizasaun komérsiu ne’e be diak liu mak sai ema barak nia atensaun. Maski nune’e, labele hili zona ne’e be kloot liu hodi difikulta fali anin nia movimentu no dada iis la diak. Lokalizasaun ne’e be furak tenki iha meius ne’e be diak ba públiku tama no sai.
Iha konteistu komérsiu modernu nian, lokalizasaun komérsiu ne’e be konsidera diak iha fasilidadi ba transporte pára fatin, atendimentu ba transporte públiku, no la dook hosi sentru administrasaun governu nian. Tan ne’e lalika hakfodak, se lokalizasaun komérsiu ema Xina nian maioria lokaliza iha sidadi boot sira. Iha fatin hanesan ne’e mak sai nudar sentru atividadi ekonómika no fatin sirkulasaun osan nian.
Loke loja ka komérsiu iha fatin ne’e be ema laiha ka la barak la’os nudar dezisaun ne’e be matenek, eseptu fatin ba ema atu husu konsultasaun ruma. Karik situasaun modifika ona wainhira ema fa’an no sosa sasan liu hosi internete tanba téknolojia komputador. Maibé, ba komérsiu konvensionál, maneira ema Xina hili lokalizasaun komérsiu bele uza hodi buka rai no fatin ne’e be diak ba komérsiu. Atu hetan lokalizasaun nune’e, loloos la’os fásil no baratu. Komersiante tenki barani hasai osan barak atu hetan fatin hanesan ne’e. Konsidera deit ne’e nudar investimentu tempu badak hodi hetan lukru ba tempu naruk nian. Maneira ne’e mak ema Xina halo no uza espresaun ne’e “atu hetan ikan boot, ita tenki prepara iska no kail ne’e be diak”.
Rezumu ikus, nudar faktu katak Fen shui nudar buat fiar nian ne’e be la’os buat bosok nian hanesan ita kumpriende. Fen shui laiha relasaun ho superstisaun ka mitu, istória mamuk. Fen shui nudar jéneru siénsia no jeógrafu ne’e be ema Xina uza hodi detekta rai, fatin halo atividadi komérsiu no fatin harí uma ne’e be kompatível ba ema.